Dins sas capsulas radiofonicas, Rose Blin-Mioch, Doctora en lengas Romanicas especialitat occitan, nos presenta una òbra literària de sa causida : paratexte, fons, forma e lenga, la literatura occitana contemporanèa recela encara plan de suspresas.
De lecturas per fin de balhar un abans-gost d'aquelas òbras.
Cronica radiofonica creada pel Setòri Felipe Carcasses per fin de conóisser melhor lo Lengadòc a travèrs son istòria, sos mites e legendas, aital que sa lenga amb lo dialecte lengadocian : vocabulari, gramatica, prononciacion, especificitats de la cultura lengadociana son tant de subjèctes abordats.
De lecturas d'extrachs de la poësia de Max Roqueta illustran notadament l'occitan oriental de la region.
Animada per Felipe Carcasses et registrada per Radio Lenga d'Òc (Montpellier) despuòi 2013.
Emission del 25 de febrièr de 2020
Festenau de vidèo Rescontre : episòde X
Lo festenau Rescontre, dedicat a la produccion audiovisuala e organizat per Tè Vé Òc, qu'es tanben productritz de l'emission « Lenga d'Òc », festejèt sa 10enca edicion a la biblioteca Simone Veil de Marguerita. Dins una sala de projeccion clafida, lo monde descubriguèt lei realizacions divèrsas e variadas d'artistas, de documentaristas amators, de jornalistas e de simples passionats de montatge vidèo. Pas mens de sièis dei participants presents an respondut a nòstrei questions, toteis implicats dins la valorizacion de la cultura nòstra. Venètz a la descubèrta dei projècts de cadun, de son biais d'obrar, ambé de tròç dei corts-metratges difusats au Festenau.
Un reportatge d'Amada Cròs
[resumit de Tè Vé Òc]
Emission del 18 de febrièr de 2020
Rugbi de XIII : un espòrt regionau
Lisa Gròs qu’aviá pas jamai vist un match de rugbi, aguèt l’idèa d’anar descubrir un match de Rugbi de XIII dins l’estadi Domec de Carcassona e de ne faire aquel reportatge. Lei comentaris de Joan Francés Albert fuguèron enregistrats en direct. Joan Francés, cap d’establiment dei doas Calandretas de Carcassona e d’aquela de Viladubert, permetèt ansin a la Lisa de comprene çò que filmava. D’autant qu’el es entreinaire d’una equipa de rugbi e ancian jogaire. A vos ara de venir descubrir aquel espòrt regionau tant presat dins lo Carcassés tant per leis femnas coma leis òmes.
Un reportatge de Lisa Gròs
[resumit de Tè Vé Òc]
Emission del 12 de febrièr de 2020
Bruno Peiràs un occitan au Senegal
Bruno Peiràs, poèta e agronòme, fondèt l'associacion SYFSED (Sinergia Franco Senegalesa per l'educacion e lo desvolopament) per ajudar de paisans , pròche Kolda au Senegal. En relacion amb lo SYSED (Sinergia Senegalesa per l'educacion e lo desvolopament) ja existent dins lo pais, l'associacion menèt de semenças e de materiau. Dins de parcèlas asagadas venon ara de lhums. Rescontram dins l'emission un cultivator e un terapèute/poèta africans. De moments d'escambis rics.
Un reportatge de Lisa Gròs
[resumit de Tè Vé Òc]