Explorar los documents (701 total)

Escrivans qu'ei ua seria consacrada a la riquessa de la literatura occitana contemporanèa, abordada per l'espiar deus autors. Que's presenta en ua seria de corts pertrèits filmats dens los quaus los autors expausan la lor trajectòria, lo lor anar artistic, lo lor rapòrt a l'escritura e las lors influéncias.

Cadua d'aquestas entrevistas que s'acompanha de la lectura, peu quite escrivan, d'un extrèit de l'ua de las soas òbras. Aquesta sason qu'ei dedicada aus escrivans de la region Occitania, un navèth pertrèit estant difusit cad mes.

Dens aqueste episòdi, Alan Roch que parla de son libre Lo rossinhòl arganhòl (IEO Aude, 2015).

[resumit : ÒCtele]

Emission dau 19 de julhet de 2019

Alan Fornells es un infirmièr a la retirada. Fai ja 30 ans que sa passion creativa lo clavela dins son atalhièr a Bassan, dins Erau. Lei objèctes que farga an una particularitat : son de mòbles bastits a partir de materiaus recuperats, coma de cagetas de fruchs e liumes, per exemple. De tot aquò tira d'istòrias qu'acompanhan lei mòbles. Es dins son atalhièr que nos convida au rescòntre de sei creacions que met tanben en scena, au biais d'un contaire, per lei vesitas dubèrtas en totei. Alan nos mena dins son univèrs onte leis omenatges son nombrós e onte renha una certana malanconiá darrièr l'estrambòrd. Entre art, bricolatge e poesia, nòstre creatiu sublima çò que servissiá pas mai, recicla lei matèrias per un assemblatge pron pensat, e de còps que i a, es menat per la fòrça deis objèctes memes.
Un reportatge d'Amada Cròs.

A Salinèlas, en país someirés, quauca ren se preparava despuèi de mes, dins l'encastre dau Total Festum. Ambé, entre autrei, la volontat de l'editor de L'Aucèu libre Pau Martin, son nascuts lei « Rescòntres Salinèlas : literaturas e creacions d'Òc actualas ». Una primièra edicion que recampava un molon d'especialistas e d'autors, amb una generacion que renovela la literatura d'òc, mai que tanben prepausava un concors d'escritura en occitan per encoratjar lei joines. Aqueu rendètz-vos recampèt tant de militants coma de curiós. Tè Vé Òc èra presenta tota la dimenchada e vos prepausam ara una revista d'aqueu moment inedit e ambiciós. Mòstras, taulièrs d'editors e d'autors, conferéncias-debats, lecturas, contes e musica... E tanben una cabussada dins lo polit vilatge de Salinèlas.
Un reportatge de Miquèu Gravier.

Emission dau 24 de julhet de 2019

Lo tambornet es un espòrt tradicionau dins Eraut, mai tanben dins d'autrei regions d'Euròpa. Leis espòrtius utilizan un tambornet per picar e remandar una bala de l'autre costat de l'estadi. Aquí, aquel espòrt fuguèt valorizat e institucionalizat per Max Roqueta, que creèt la Federacion dau tambornet quora èra jovent. Siam anats en Anhana, a l'escasença d'un rescòntre entre la còla d'Anhana e aquela dei Penas-Mirabèu. Ambé Lionèl Causse e son amic Benjamin Marc, farètz la coneissença d'un espòrt qu'exigís fòrça e agilitat. Lo jòc dau tambornet se pratica ambé doas còlas, tant en exterior coma en interior. Nautrei vos prepausam leis especificitats dau jòc en terrenh exterior, ambé de tròç. Aquí, cada jogaire a una foncion particulara : dos « fons » (e mai bacelaires) que clavan lo terrenh, au mitan un "ters", puèi davans eu dos « cordièrs ».
Un reportatge de Marc Carteyrade e Amada Cròs.

Emission dau 20 de abril de 2018

Au collègi Ambrussum, a Lunèu, vos prepausam un retrach de Catarina Dufour, alias Catí, qu'ensenha la lenga nòstra. Nos parteja sa passion d'un mestièr ja dificile, e que l'especialitat occitana es mai qu'es mai amenaçada per la legislacion. Maugrat tot, Catí s'investís totjorn mai, en prepausant tant que lo pòu a sei collegians d'activitats ricas de tota mena. Aurètz l'escasença de lei descubrir dins nòstra emission : lei viatges, la creacion de filmòts ò de libres. Nòstra professora utiliza ansin leis aisinas modèrnas diversificadas dins son ensehnament, per lo rendre mai viu e atrivar lei jovents. Amb lo sorire, Catí nos presenta una personalitat, una vocacion e una profession creativa.
Un reportatge de Lisa Gròs.

Albert André es un pintre post-impressionista nascut a Lion. Mai passèt una granda partida de sa vida dins Gard, dins lo vilatge de Laudun, onte sa familha bastiguèt un ostau. Lo talent de l'artista fuguèt remarcat per Auguste Renoir e sostengut per Jòrgi Besson. Per aquela emission, avèm rescontrat Elian Cellier, president de l'associacion "Les Amis d'Albert André", per nos parlar dau pintre e de seis estacas. Tanben, lo 26 de mai se festejèt lei 150 ans de la naissença d'Albert André, un eveniment organizat per l'associacion d'Elian Cellier. Aquò donèt una manifestacion polida amb de gents costumats, una mòstra de veituras ancianas, d'objèctes de la Bèla Epòca e d'animacions per de grops folclorics. Cabussatz dins l'intimitat d'una figura de Laudun ! Un reportatge d'Amada Cròs.

Au collègi « La Valada verda », a Vauverd, nòstra lenga ten una plaça bèla. Avèm rescontrat Estefan Lombardo, qu'es professora d'occitan. Nos racontèt lei principes e enjòcs de son mestièr, dins un temps qu'es en grand dangièr ! Tanben, n'avèm profichat per seguir Isabèla Fougairolles, professora de sciéncias de la vida e de la tèrra. Aquesta participèt a un projècte Erasmus sus lo tèma de la biodiversitat. Per aquò, menèt seis collegians en Camarga Pichòta, dins leis arenas de Bèuvesin. Fuguèt ansin l'escasença per leis escolans d'aquí e sei correspondents estrangièrs en sejorn en cò nòstre, de descubrir la bovina, subretot la corsa camarguenca, amb la preséncia de rasetaires.
Un reportatge de Lisa Gròs.

Vos menam a Sant-Guilhem dau desert, au còr dau festenau Les Marteaux de Gellone. Aquela manifestacion, organizada per lo Centre Internacionau de Musicas Medievalas, presentèt doas seradas ligadas a la litteratura nòstra, dins l'encastre d'un partenariat amb Total Festum. Nautrei avèm filmat la serada Ladoncs chantatz, amics ! e entrevistat un dei cantaires, Brice Duisit. Nos donèt d'explicas sus aquela mena de serada, un concèrt interactiu, amb una competicion entre cantaires. Lei targas musicalas fuguèron l'opportunitat per Brice Duisit e Maurise Moncozet, acompanhats dau musician Olivier Féraud, de s'afrontar sus un repertòri de trobadors coneguts. Descubrètz tanben d'imatges rodats dins l'atalhièr d'arqueo-lutaria d'Ugo Casalonga, ont d'estagiaris realizèron una guiterna.
Un reportatge d'Amada Cròs.

La Calucada es un temps fòrt en Cevenas, e que presenta aquest an sa 9e edicion. A la tèsta d'aquela animacion, l'"Association Musique Imagineïre" qu'organiza cada an un rendètz-vos coregrafic dins un mas a Rògue, dins Gard. La Calucada constitís de prepausar a un public larg un estagi de danças tradicionalas de tota mena e de tota origina, en gestion solidària. E mai se son de danças collectivas, la formacion es dubèrta en totei. Proficham d'aquel estagi per entrevistar en lenga nòstra Silvia Berger, artista polivalenta que mena lo cors ambé lo musician Sèrgi Desaunay. Amb aquò, de polits tròç de danças tradicionalas coma lo brande.
Un reportatge de Lisa Gròs.

L'an passat, aviam cubert la Passejada Literària en Agde, e vos prepausam un reportatge nòu per 2019. La Passejada Literària es una jornada que recampa d'enfants dau primari a l'entorn d'activitats animadas per d'autors. Lòng de l'annada, un trabalh de lectura e de causida se fai a l'entorn d'òbras causidas per la jurada. Leis enfants pòdon elegir un libre que li a agradat lo mièlhs, entre una tièra adaptada a cada seccion. Aquest an, la Passejada Literària càmbia de luòc. La calandreta d'Agde donèt la man a la calandreta Aimat Serre, a Nimes. Es au Mas Bolbon qu'avèm rodat nòstra emission e onte vos prepausam de descubrir aquela manifestacion pedagogica que festeja sa 4ena edicion !
Un reportatge de Miquèu Gravier.