Explorar los documents (69 total)

vignette_LGO-20220223.jpg
Las cassòlas Not - Tè Vé Òc
Gros, Lise. Metteur en scène ou réalisateur

Emission del 23 de febrièr de 2022

Las cassòlas Not

Au Mas Sainte Puelles (11), a riba del Canal del Miègjorn, descubrissem la potariá Not, ben coneguda per sa fabricacion de cassòlas onte se prepara lo famós cassolet dins la region tota. Tres generacions de la familha Not mantenguèron la tradicion de la fabricacion d'aquelas caçòlas e es la tresena generacion que rescontram uèi. I a aquí una vertadièra caforna d'Ali Baba onte trobam las cassòlas de segur mas tanben d'autres creacions : plats, objèctes de decoracion, coma la crotz occitana e los famós diables, de plats especiaus per faire coire la volalha.

Un reportatge de Lisa Gròs

[resumit de Tè Vé Òc]

vignette_LGO-20220112.jpg
N'i a pro : Laurent Cavalié e Marie Coumes al Salon dels vins bio a Sant Ilari - Tè Vé Òc
Gros, Lise. Metteur en scène ou réalisateur

Emission del 12 de genièr de 2022

N'i a pro : Laurent Cavalié e Marie Coumes al Salon dels vins bio a Sant Ilari

"N'i a pro" es un espectacle montat per Laurent Cavalié e Marie Coumes sus las luchas vinhaironas dins las annadas 60/70. I trobam de tèxts de Marti, Michel Décor, Alranc e Rouquette.
Lo salon dels vins biò organizat dins l’abadiá de Sant Ilari (11) aculhiguèt per aquel espectacle un public nombrós. Degustacions, presentacion de vins bio aguèron un succès grand.
Rescontrèrem d' òmes e de femnas afogats de son pais e de sos vins, en particular la blanqueta. Descubrissem dins una entrevista coma aquela blanqueta nasquèt, a Sant Ilari tot bèl just.

Un reportatge de Lisa Gròs

[resumit de Tè Vé Òc]

vignette_LGO-20220105.jpg
Bufalonas en Corbièras- Tè Vé Òc
Gros, Lise. Metteur en scène ou réalisateur

Emission del 05 de genièr de 2022

Bufalonas en Corbièras

De bufalonas en Corbièras, aquò vos estona ? De segur que n’i a mai en Italia ! Venetz descubrir l'integracion capitada d'una familha italiana a Pradelles, dins la Val de Danha/ Corbièras, pròche Carcassona. La proprietat granda de « La Bourdasso » compren un restaurant reputat tengut per la familha Antonini. Alexandra Antonini, que s’ocupa de la bòria amb son òme, nos parla d'una installacion pauc comuna e nos explica coma faire una mozarella deliciosa. Las bèstias installadas sus un espaci grand de garriga son noiridas d’èrba seca. La reproduccion es naturala e los vedèus naisson tota l’annada. Es Alexandra que fabrica la mozzarela que vai vendre puèi suls mercats e comèrcis de la region. Fabrica tanben de glaças, de mozzarela seca e de salcissa seca de bufalonas.

Una capitada de las bèlas de veire dins lo reportatge de Lisa Gròs.

[resumit de Tè Vé Òc]

vignette.jpg
Nadalenca - estagi e concèrt - Tè Vé Òc
Gros, Lise. Metteur en scène ou réalisateur

Emission del 15 de decembre de 2021

Nadalenca - estagi e concèrt

Nadalenca es un còr del Clapàs e vesem aquí un temps d'estagi amb Danielle Franzin, cantaira del ròdol de Nissa. Es venguda per preparar un concèrt bèl per lo temps de Nadal. L'ostal dels còrs de Montpelhièr met en valor un trabalh regular. Los cantaires se recampan cada dimarç a l'Ostal d'Occitania. Marijo Dory, la presidenta nos prova son enveja de faire clantir la lenga occitana. Un public nombrós se regalèt del repertòri presentat per dos caps de còr : Roxane Vega e Danielle Franzin. Cant còrse, cants provençals e nadals lengadocians fuguèron fòrça precejats.

Un reportatge de Lisa Gròs.

[resumit de Tè Vé Òc]

vignette_LGO-20211023.jpg
L'abadiá de Lagrassa - Tè Vé Òc
Gros, Lise. Metteur en scène ou réalisateur

Emission del 23 d'octobre de 2021

L'abadiá de Lagrassa

L'abadiá de Lagrassa es un joièu dei Corbièiras. A riba d'Orbieu s'apara un  pauc dei vents. Es monumentala e luminosa. Una carta fuguèt signada per sa creacion en 779 per Carlesmanhe. A l'ora d'ara, 40 religiós (20 prèires) vivon dins l'abadiá. Trabalhan au jardin e a l'òrt o dins l'abadiá. Leis oficis ritman la jornada. Lo clastre, la glèisa, lei salas diversas, lo jardin son de descubrir. Lei monges cultivan la vinha e l'olivièr, doncas  vendon sei produchs, de libres e d'objèctes religiós dins la botiga a l'entrada de la cor d'onor. Es Joan Blanc, un istorian ben conegut a Carcassona que nos guidèt per aquela visita. Lo mercejam de son ajuda preciosa.

Un reportatge de Lisa Gròs.

[resumit de Tè Vé Òc]

vignette_LGO-20211012.jpg
Visita de Lagrassa, vilatge occitan dins Aude - Tè Vé Òc
Gros, Lise. Metteur en scène ou réalisateur

Emission del 12 d'octobre de 2021

Visita de Lagrassa

Lagrassa es un vilatge occitan polit dins un paisatge de vinhas e de sèrres, a riba d'Orbieu dins Aude. Es classat entre lei mai bèus vilatges de França. Veirem dins lo reportatge lo vilatge medievau au centre, amb son mercat cobèrt. Es un joièu de l'arquitectura de l'edat mejana. Èra un luòc d'escambis important, lo mercat mai grand dei Corbièiras. L'abadiá recebiá de taxas e leis estajants ne tiravan profièch tanben. Veirèm puèi l'abadiá famosa fondada en 779 per Carlesmanhe e descubrirem la partida de l'abadia qu'es ara la proprietat del Conselh Despartamentau. Aquela visita vos donarà l'enveja d'anar descubrir Lagrassa !

Un reportatge de Lisa Gròs.

[resumit de Tè Vé Òc]

vignette_LGO-20210915.jpg
Mans de Breish : camins d'un cantaire militant - Tè Vé Òc
Gros, Lise. Metteur en scène ou réalisateur

Emission del 15 de setembre de 2021

Mans de Breish - camins d'un cantaire militant

Retrobam a Serviès en Val de Danha (11), lo Mans de Breish que canta dempuèi d'annadas son pais e sa lenga occitana. Lo rescontrèrem aquest'estiu dins lei Corbièras a Villar per una bèla serada de fèsta amb scèna duberta. Mans de Breish fuguèt un dei primièrs cantaires de la nòva cançon occitana amb Robert Marti e d'autrei. Fuguèt present sul Larzac tre la debuta de la lucha e respondèt present a totei lei manifestacions de defensa de la lenga e la cultura occitana. Laissèt jamai sa region e contunha d'onorar l'occitan amb sa votz bèla e plena. Canta totjorn tant ben e vos espera a sei concèrts.

Un retrach de Lisa Gròs.

[resumit de Tè Vé Òc]

vignette_LGO-20210728.jpg
Lo molin de papièr a Brossa (Auda) - Tè Vé Òc
Gros, Lise. Metteur en scène ou réalisateur

Emission del 28 de julhet de 2021

Lo molin de papièr a Brossa

Dins la valada de Dura, la rivièra bèla, a Brossa pròche Carcassona, un vertadièr joièu : lo molin de papièr nos aculhís. Tot i es presentat amb suènh e dins lo socit d'una transmission de saber faire. Un endrech bèu e ben concebut per faire veire coma se fabrica lo papièr a partir de fatas recuperadas e pas d'arbres. De maquinas ancianas, de qué fabricar lei fuèlhas, un talhièr pedagogic per enfants o adultes, tot es lest per vos aculhir. La rivière Dura vos acompanharà de sa cançon tot dau long de la visita agradiva e rica.

Un reportatge de Lisa Gròs.

[resumit de Tè Vé Òc]

vignette_LGO-20210608.jpg
Narbo Via, lo musèu novèl de la Narbona antica - Tè Vé Òc
Gros, Lise. Metteur en scène ou réalisateur

Emission del 8 de junh de 2021

Narbo Via, musèu novèl

A Narbona, en mai de 2021, se dubriguèt  lo musèu  Narbo Via. Concebut per Norman Foster & Partners, es fòrça capitat e d’une riquesa granda. Dins l’antiquitat romana, Narbo Martius èra una colonia importanta e lo pòrt que se trobava sus leis estanhs vèrs la Nautica e Mandirac, vesiá passar un molon de mercandisas. Narbona èra ben plaçada au crosament de la Via Domitia e de la via Aquitania e èra prospèra. Es lo pòrt que presentam dins aquel reportatge, amb batèus e anfòras. Dins de salas de projeccion, avem de vistas subrebèlas sus de batèus e son fonccionament. Dins lo musèu una paret monumentala es dedicada a de bas relèus e  de pèiras escultadas que donan una idèa precisa de la civilizacion de l’epòca antica. Mosaicas, estatuas e vestigis variats vos pivelaràn. L’entrada dau Musèu es a gràtis tot lo mes de junh.

Un reportatge de Lisa Gròs.

[resumit de Tè Vé Òc]

vignette_LGO-20210602.jpg
Manifestacion per lei lengas regionalas - Tè Vé Òc
Gros, Lise. Metteur en scène ou réalisateur

Emission del 2 de junh de 2021

Manifestacion per lei lengas regionalas

Lo 29 de mai de 2021, leis occitanistas se recampèron un pauc de pertot en Occitania. Dins leis autrei regions tanben leis aparaires de totei lei lengas regionalas venguèron exprimir sa colèra après la sasina dau Consèlh constitucionau que pòrta un prejudici grand a la lei Molac votada d’aperavans. L’ensenhament imersiu es amenaçat tant dins l’ensenhament public coma en Calandreta.
Nòstra còla se desplacèt a Nimes, Carcassona e Somèires per testimoniar de la volontat dau pòple d’Òc de pas se laissar raubar sa lenga e sa cultura. Leis entrevistas fan ben veire la determinacion deis occitans de pas se laissar faire e d’autreis accions seràn previstas per aquò. TèVéÒc, directament concernida seguirà de pròche la situacion.

Una realizacion de Lisa Gròs.

[resumit de Tè Vé Òc]

sus 7