Emission del 05 de genièr de 2022
Bufalonas en Corbièras
De bufalonas en Corbièras, aquò vos estona ? De segur que n’i a mai en Italia ! Venetz descubrir l'integracion capitada d'una familha italiana a Pradelles, dins la Val de Danha/ Corbièras, pròche Carcassona. La proprietat granda de « La Bourdasso » compren un restaurant reputat tengut per la familha Antonini. Alexandra Antonini, que s’ocupa de la bòria amb son òme, nos parla d'una installacion pauc comuna e nos explica coma faire una mozarella deliciosa. Las bèstias installadas sus un espaci grand de garriga son noiridas d’èrba seca. La reproduccion es naturala e los vedèus naisson tota l’annada. Es Alexandra que fabrica la mozzarela que vai vendre puèi suls mercats e comèrcis de la region. Fabrica tanben de glaças, de mozzarela seca e de salcissa seca de bufalonas.
Una capitada de las bèlas de veire dins lo reportatge de Lisa Gròs.
[resumit de Tè Vé Òc]
Emission del primièr de decembre de 2021
L'auborada dei Ficheirons
Lo 14 de novembre de 2021 a Nimes fuguèt comemorada l’auborada dei ficheirons. Fa cent ans, a l’iniciativa dei manadièrs e felibres Folco de Baroncelli-Javon e Bernat de Montaut-Manse una manifestacion sostenguda per la Nacioun Gardiano e l’Antica Confrariá dei Gardians aviá regropat dins lei carrièras de Nimes de centenats de gardians que protestavan contra una assignacion en justícia per la Société protectrice des animaux, que deviá èstre jujada a Nimes en decembre. Aquela assignacion portava sus l’organizacion de doas corridas organizadas a Nimes e una en Arles.
Lei manifestants de 1921 protestavan contra l’atenta a l’identitat e ai costumas provençalas mesas en causa per una aplicacion estricta e tendenciosa de la lei Grammont de 1850 sus lei crudelitats contra leis animaus. Cent ans après, l’istòria quequeja, tornamai lei praticas tauromaquicas son atacadas, l’usatge dei chivaus dins lo trabalh de bovina, mas tanben lo ròtle e lei praticas dau monde paisan per la cultura e la proteccion de sei produccions. La manifestacion de 2021 visava doncas a protestar contra leis agressions contra lo monde rurau, lei praticas tauromaquicas e l’identitat provençala.
Un reportatge de Miquèu Gravier.
[resumit de Tè Vé Òc]
Emission del 17 de novembre de 2021
Joan-Maria Roussel, estatjant de Bourdic
Aquesta setmana Tè Vé Òc anèt au rescontre de Joan-Maria Roussel un estatjant dau vilatge de Bourdic (ducat d'Uzès) . Joan-Maria nos faguèt visitar lo vilatge e parlèt d'una de seis activitats: una pagina Facebook onte enregistra cada setmana una vidèo en lenga nòstra. Seguiguèt lei cors d'occitan de l'IEO 30 a Sant Geniès de Malgoirès per lo plasèr de parlar son "patoès" de Bourdic, vilatge qu'aima tant. Comencèt pendent lo confinhament per de cronicas sus lo vilatge e seis edificis de remarcar, puèi fuguèt sus lei praticas de cada jorn, lo trabalh de la tèrra e lei tradicions. Ara contunha en causissent cada còp lo decòr que conven a sa cronica. De retrobar sus sa pagina Facebook.
Un retrach per Miquèu Gravier.
[resumit de Tè Vé Òc]
Emission del 3 de novembre de 2021
Lo Salon dei culturas provençalas a Cadarossa
Dins lo vilatge de Cadarossa, en Vauclusa, la municipalitat organizèt en octòbre lo 1er Salon dei culturas provençalas. Iniciat per l'adjoncha a la cultura Beatritz Rehor e pairinejat per l'animator TV Frederic Soulié, lo projèct veguèt lo jorn sus una dimenchada completa, ambé de taulas d'expausants, d'animacions divèrsas dins la tantossada e de concèrts en debuta de serada. Literatura, tradicions, creacions, ensenhament, teatre, dança e musica an trobat sa plaça dins aquela manifestacion novèla. Vos prepausam adonc dins nòstra emission un apercebut d'aquel eveniment, embé de tròç nombrós d'animacions e quauqueis entrevistas.
Un reportatge d'Amada Cròs.
Musicas e cants enregistrats lei 16/10 e 17/10/21 dins la Sala Pierre Cuer a Cadarossa (84)
- Jan-Bernat Plantevin
- I anen
- La Calandreta d'Aurenja
- Les Enfants de l'Ouvèze
- L'Escolo dóu trelus
- La Cabro d'Or
- Le Moulin de Brétoule
- Le Condor
[resumit de Tè Vé Òc]
Emission del 19 de octobre de 2021
Collectatge dins Mondragon e son entorn
Nos interessam de mai pròche au caminament e a l'òbra de collectatge de Valentin Conte. Despuèi sa jovença, s'empreissa de recampar la literatura orala e populària dins lo canton de Mondragon, au nòrd de la Vauclusa. Sa passion per la lenga e tot çò que pòu portar l'a menat d'enregistrar sus ben lèu 20 ans de testimoniatges deis ancians, avans la despartida d'aquestei : istòrias, legendas, cançons, galejadas, biais de viure... Entre autrei nos fai lo plaser de nos passar la votz d'Enric Clariot que canta « La cançon dau Drac », figura emblematica de Mondragon. Rescontram tanben Mirelha Bastet, Mondragonesa que contribuís a l'òbra de transmession de la lenga embé lei pichòts.
Un retrach d'Amada Cròs.
[resumit de Tè Vé Òc]
Emission del 6 d'octobre de 2021
Un remèdi per sason ambé Florença Faure Brac
Florença Faure-Brac es botanista. S'interèssa de mai pròche ai plantas sauvatges que se podòn manjar e ai plantas medecinalas. Alòr, dins aquesta emission, i' avèm demandat de chausir e de nos presentar quatre remèdis naturaus e d'aise de faire. Au Mas dei Claparèdes a Montolieu, Florença elabòra etapa per etapa la preparacion dei remèdis, un per cada sason. De l'automna a la prima, anatz descurbir de recèptas utilas que podètz faire en cò vòstre, ambé d'ingredients simples e pauc de vaissèla. Maus de garganta, mans degalhadas, alergia, bruladura, … tot aiçò que se pòu sonhat ambé lei consèus de Florença !
Un reportatge d'Amada Cròs.
[resumit de Tè Vé Òc]
Emission del 22 de setembre de 2021
Lo temple dau vin biò
Lo vin biò a lo vent en popa e la mai granda cava viticòla biò en França se troba a Codonhan dins Gard. Son president, Jean Fred Coste nos recebèt dins aquel « Temple » per nos contar l’istòria de l’aveniment dau vin Biò dins aquela region. Lo desvolopament creissent d’aquela cultura abotiguèt tres ans fa a la bastison d’una cava importanta moderna e d’avans garda. Un vertadièr espleit performant permetent ai viticultors cooperators d’envisatjar amb serenitat l’avenir.
Un reportatge de Marc Carteyrade.
[resumit de Tè Vé Òc]
Emission del 8 de setembre de 2021
Aumessas - vilatge de caractèr
Per aquesta emission, vos presentam Aumessàs, un vilatge cevenòu qu'a obtengut lo labèu « Village de caractère » en 2019, per la mesa en valor de son patrimòni arquitcturau e culturau, ambé seis mestièrs ancians e mai per l'acuelh dei toristas. An' aquò se podriá apondre l'occitan que i auriá per segur tota sa plaça dins un vilatge coma aqueste. Venètz ambé nautrei rescontrar Nadina Baumier, estajanta e nativa d'Aumessàs. Nadina es un temoin privilegiat de l'evolucion de son vilatge, e sarà nòstra guida dins aquela visita.
Un reportatge de Miquèla e Patric Lapierre.
[resumit de Tè Vé Òc]
Emission del primièr de setembre de 2021
Universitat Occitana d'Estiu a Nimes #45
L'Universitat Occitana d'Estiu a Nimes es una institucion vertadièra dins lo mitan militant, associatiu e culturau occitan. Après una adaptacion en edicion numerica per 2020, retrobam aquest an la còla e lo programa dins son espaci abituau despuèi 2017, l'Ostau Diocesan de Nimes. Per sa 45enca edicion, leis organizators chausiguèron la tematica seguenta : « Òme/ animal : quinas evolucions dins las relacions ? ». Nautrei avèm poscut curbir una granda partida dau programa. Vos presentam adonc aquesta revista de l'edicion de 2021, ambé doas entrevistas de sòcis de la M.A.R.P.OC e de tròç dei divèrseis animacions organizadas. Descubrètz un apercebut d'aquesta manifestacion benvenguda en temps de distanciacion sociala e d'isolament.
Un reportatge d'Amada Cròs.
[resumit de Tè Vé Òc]
Emission del 14 de julhet de 2021
Lei Rescontres de Salinelles
Un temps fòrt per la cultura occitana : lei Rescontres de Salinelles (30) que metèron la lenga a l'onor. La poesia amb de poètas e poetessas venguts d'Occitania tota, la literatura amb la preséncia d'ostaus d'edicion, lo conte amb Ester Lucada, la creacion musicala e poetica amb Rodin Kaufmann, lo concèrt/balèti e lei creacions dau grop Coriandre, brèu, una fèsta vertadièra organizada per l'editor Paul Martin e sa femna Maria Elena (L'aucèu libre), Estelle Cecarrini e Paulina Kamakina. La defensa dei lengas regionalas fuguèt facha per Michel Feltin Palas per acabar.
Un reportatge de Miquèu Gravièr.
[resumit de Tè Vé Òc]