Originari d'Avairon, Joan-Carles Codèrc a primièr practicat lo grafisme. De sas primièras armas de grafaire, garda primièr un amor per la paret La paret coma partida integranta d'un luòc, coma afirmacion d'aqueste. L'artista aima se definir coma parietalista ; va fins a utilizar los pigments dins la tèrra dels endreches ont dessenha.
Joan-Carles Codèrc s'emplega a cartografiar la memòria : sos entrelaces, sas zònas d'ombra e de lum. La representacion escricha de la lenga occitana, de sos mots, de sos torns e de las causidas tipograficas operadas per la figurar son al centre de son atencion.
Lo trabalh sus la tipografia es caracteristic de l'òbra de Joan-Carles Codèrc.
Club Muxu amassa dos artistas adèptes del street-art : l'avaironés Jean-Charles Couderc e la basca Magali Etcheverria, dicha Gau Txoria. Aquestes fan dialogar l'occitan e lo basc per exprimir de revindicacions comunas.