Lo camp militar de Larzac creat en 1902 foguèt, tot lo sanclame del sègle vint, un luòc provocant l’interès dels estatjants de Roergue mas tanben, los tres quarts del temps, l’èrnha dels òmes apelats per participar a de manòbras militaras. Dos periòdes se debanan dins aqueste roman. Lo primièr se passa a la fin de las annadas cinquanta e a la debuta de las annadas seissanta pendent la guèrra d’Argeria. Lo camp militar foguèt agençat en camp d’embarrament de militants del F.L.N. (front de liberacion nacionala). Lo segond se debana dins las annadas setanta amb lo projècte d’espandiment del camp militar que provoquèt lo regèt massís dels païsans de Larzac e d’una certana opinion publica. Es dins l’ambient d’aquestes dos periòdes que l’autor situa l’accion del roman. Mesclant ficcion e realitat nos fa viure d’eveniments istorics e de dramas misterioses.