Rous lou bandit e, pèr abitudo, ié pode plus douna un autre noum. Pamens, s’èro aqui, ié toucariéu la man emé plasé e ounour. Es d’aquéu biais qu’Andriéu Chamson coumenço lou raconte de Rous lou bandit, l’istòri d’un refratàri de la guerro de Quatorge que se refugiè dins lou massis de l’Egoual pèr segui l’enjouncioun divino « Tuaras pas ». Mau-grat lou tèmo de l’óujeicioun de counsciènci, aquest libre, publica en 1925, aguè d’acuiènço favourablo. Durbiguè maïstralamen la prouducioun roumanesco dóu jouine escrivan e ié dounè acès i ciéucle literàri li mai important dou siècle XXen. Bono-di aquest libre, Chamson nousè d’amista soulido emé li grands einat coume Rouman Rolland e lis autour de sa generacioun coume Andriéu Malraux.

Andriéu Chamson (1900-1983) tenguè d’àuti founcioun poulitico — dins li gabinet d’Edouard Daladier en 1927 e 1934 — e amenistrativo : counservatour-ajoun dóu Castèu de Versaio (1933), dóu Pichot Palais (1945-1959) pièi direitour generau dis Archiéu de Franço (1959-1971). Intra en literaturo emé Roux le Bandit en 1925, pourgiguè uno obro aboundouso, publicado à l’estrangié dins mai de vint lengo. Foundado sus li Ceveno emé la Suite cévenole, que Rous lou bandit n’en fai partido, et la Suite camisarde que clavo lou tout, toco peréu li dramo de la guerro e li proublèmo dóu tèms. En 1956, es elegi à l’Académie française e à la presidènci dóu PEN Club internaciounau que counsacro sa pousicioun centralo dins li letro. E en 1957, devèn majourau dóu Felibrige.

Felip Reig es dóutour ès letro óucitano, majourau dóu Felibrige e sendi de la Mantenènço Lengadò-Roussihoun.