Lo darrèr roman de Sèrgi Javaloyès, Viral, que vien de paréisher a las edicions In8. Daniel, jornalista, qu’ei espitalizat en catastròfa per ua septicemia fulminanta. Hregant la mort, enter l’extrèma luciditat qui atisa l’urgéncia de víver e los deliris visionaris dignes d’un poèta romantic, los sons engatjaments d’estudiant que’u pujan a la memòria. A mesura de las progressions e regressions de la malaudia, que dreça atau la cronica d’ua joenessa estudianta, a Pau, dens las annadas setanta. La soa vita qu’ei bocavirada per dus huecs, las soas prumèras experiéncias amorosas e sexuaus, e la violéncia de las accions independentistas bascas, miadas dens la clandestinitat. Dens aqueth roman, Sèrgi Javaloyès que liura un testimòni sus dus combats qui an marcat la soa trajectòria personau, lo deus movements politics bascos, e lo d’un òmi atacat per un estafilocòc daurat. Un libe d’autan mei preciós que l’espiar ei agut, neurit per la luciditat de l’experiéncia.

Lenga : occitan gascon
Tà’n saber mei : http://www.editionsin8.com/catalogue/livre/898-viral