Explorar los documents (8 total)
Emission del 06 de mai de 2020
La vestimenta au Musèu dau Nimes-Vièlh. Partida 2
Guilhem Chevalier, estudiant en licéncia d'occitan a Montpelhier, es un apassionat de bèus teissuts. Es tot naturalament qu'acceptèt de nos comentar, en provençau, quauqueis objèctes de la colleccion textila au Musèu dau Nimes-Vielhs. Dins aquela 2nda partida de nòstra virada, contuhnam nòstra visita au plan-pè, ambé lo membre consacrat a la tela « Denim », teissut present sus una polida tenguda tradicionala que vos es presentada. Puèi anam au 1er estanci, onte Guilhem nos dona de detalhs sus una rauba « a la francesa », sus de polits bas fabricats dins Gard, de gilets pron ancians e una capa « indigo » de pastre. Venètz nos seguir, a la descubèrta dei tresaurs de vestimenta dau Nimes-Vièlhs.
Un reportatge d'Amada Cròs
[resumit de Tè Vé Òc]
Emission del 15 d'abril de 2020
La vestimenta au Musèu dau Nimes-Vièlh. Partida 1
Guilhem Chevalier, estudiant en licéncia d'occitan a Montpelhier, es un apassionat de bèus teissuts. Es tot naturalament qu'acceptèt de nos comentar, en provençau, quauqueis objèctes de la colleccion textila au Musèu dau Nimes-Vielhs. Dins aquela 1èra partida de nòstra virada, nos arrestam au plan-pè, dins lo 1er membre. Es aquí que Guilhem nos explica l'istòria dei raubas ambé l'exemple d'una pèça presenta au mitan de la sala, puèi nos parla dei particularitats dei teissuts coma lo chale “boiteux”, leis imprimits e son evolucion... Venètz nos seguir, a la descubèrta dei tresaurs de vestimenta dau Nimes-Vièlhs.
Un reportatge d'Amada Cròs
[resumit de Tè Vé Òc]
Emission del 25 de març de 2020
Lo vilatge trogloditic de Barri a Bolena
Anam sus leis relèus de Bolena, dins lo massiu onte lei vestitges d'una activitat umana revelan un passat pas tant luenchenc. Lo vilatge trogloditic de Barri èra isolat de la vila e bastit sus la plana dau Barri. Juscas en 1976, un òme viviá en ermita dins una cròta amenatjada sus lo ranc de Cabrièra. Lo vilatge, e mai s'es arroïnat, es defendut per l'associacion Barry Aeria, que perseguís l'òbra de son predecessor « Les amis de Barry », per aparar lo site e preservar un patrimòni a despart dins la region. Avèm rescontrat a la debuta de l'annada de sòcis de Barry Aeria e un sòci de Parlaren à Bouleno, per nos parlar de la construccion e dau biais de viure a Barri.
Un reportatge d'Amada Cròs
[resumit de Tè Vé Òc]
Emission del 11 de març de 2020
L'associacion Aups de lutz a Forcauquièr
Avèm passat lei raras abitualas de nòstre aire de cubertura per venir a Forcauquier, dins leis Aups de Provença Auta. Aquí, au baloard dei Martirs de la Resisténcia, se tròba lo sèti deis Alpes de lumière, Aups de lutz en lenga nòstra. I' avèm entrevistat Clauda Martel, la presidenta de l'associacion. Son espós defuntat, Pèire Martel, fuguèt lo fondator dau movement Alpes de lumière. Davans la decompausicion dau païsatge provençau, la partença deis estajants e la degradacion dau biais de viure au País, Pèire Martel vouguèt sauvar çò que demorava. Una iniciativa que durarà, que l'associacion deis Aups de lutz nasquèt en 1953 e perseguís encara son òbra, ambé de nombrós domenis d'intervencions, coma lei chantiers de benevòus e l'edicion d'obratges sus la Provença larga.
Un reportatge d'Amada Cròs
[resumit de Tè Vé Òc]
Emission del 25 de febrièr de 2020
Festenau de vidèo Rescontre : episòde X
Lo festenau Rescontre, dedicat a la produccion audiovisuala e organizat per Tè Vé Òc, qu'es tanben productritz de l'emission « Lenga d'Òc », festejèt sa 10enca edicion a la biblioteca Simone Veil de Marguerita. Dins una sala de projeccion clafida, lo monde descubriguèt lei realizacions divèrsas e variadas d'artistas, de documentaristas amators, de jornalistas e de simples passionats de montatge vidèo. Pas mens de sièis dei participants presents an respondut a nòstrei questions, toteis implicats dins la valorizacion de la cultura nòstra. Venètz a la descubèrta dei projècts de cadun, de son biais d'obrar, ambé de tròç dei corts-metratges difusats au Festenau.
Un reportatge d'Amada Cròs
[resumit de Tè Vé Òc]
Emission del 13 de febrier del 2019
L'Espaci Occitan veguèt lo jorn i a ben lèu 20 ans a Draonier, dins la Val Maira, una dei valadas occitanas d'Itàlia. Avèm rescontrat la Doctoressa Rosella Pellerino, directritz scientifica a l'Espaci Occitan. Aquesta nos i explica lo foncionament dei luòcs, seis activitats, e sei relacions au numeric per mielhs convenir au public. L'Espaci Occitan recampa tres organismes que son l'institut, lo centre de documentacion e lo musèu. Vos presentam un site ric e plurau, acompanhada de tròç rodats au musèu "Sòn de lenga". Una cabussada dins l'òbra multipla de la còla de l'Espaci Occitan, que partiguèt simplament de quauquei documents e libres per arribar a la creacion d'un espaci scientific grand e dinamic.
Un reportatge d'Amada Cròs.
[resumit de Tè Vé Òc]
Emission dau 17 de genièr de 2019
Vos menam en Vauclusa, au rescòntre de Joan-Lop Guigue. Òme de la tèrra que ten son domèni viticòu a Violès, fàcia ai Dentèlas de Montmiralh, a tanben una passion per lo cònte. Fai quauqueis annadas qu'a integrat la còla dau Teatre Rurau d'Animacion Culturala (TRAC), per travalhar sei creacions. Es dins la vinha, ambé leis accions lei mai repetitivas, que s'imagina seis istòrias. Lei compausa dins sa tèsta mai leis escriu pas. Sei còntes son emprenhats de la cultura de la vinha, ambé d'inspiracions tradicionalas que se mudan en creacion originalas e presentats a la còla dau TRAC, puèi au public. Joan-Lop Guigue nos raconta aicí seis istòrias a l'escasença d'una serada literària a la librariá Elan Sud, puèi son mestier de vinhairon en cò sieu.
Un retrach d'Amada Cròs.
[resumit de Tè Vé Òc]
Emission dau 9 de genièr de 2019
Ancian medecin-cercaire, Pau Martin tornèt au País ambé la vòlha de crear son ostau d'edicion. Comencèt ambé d'obratges ja coneguts e publiquèt son promier tèxte inedit en 2009. Sei colleccions contenon un molon d'escrichs en lenga d'Òc, acompanhats de traduccions. Ambé sa femna Maria-Elèna, fan foncionar a dos una entrepresa vertadièra. A l'escasença de la "jornada dau libre" au Laudun-L'Ardoise en automne de 2018, avèm rescontrat Pau Martin e dos autoras editadas en cò d'Aucèu Libre, Danièla Julien e Estèla Ceccarini. Cabussatz dins lo monde de l'edicion e seis enjòcs a travèrs Aucèu Libre, especializat dins leis escrichs d'aquí, que siágon en occitan ò en francés. Aucèu Libre ven de fetesjar sei 15 ans d'existéncia en 2018.
Un reportatge d'Amada Cròs.
[resumit de Tè Vé Òc]